‪#‎ಕೆಂಡಸಂಪಿಗೆ‬

.
ಹಾಲುಗಲ್ಲದ ಚೆಲುವೆ ಸಾಲುಹಲ್ಲಿನ ಬಾಲೆ
ಕಾಲು ಎಲ್ಲಿಡಲಲ್ಲಿ ಏಳು ಮಲ್ಲಿಗೆ ಮಾಲೆ;
ಪಾಲು ಪಲ್ಲಟಗೊಂಡು ಜೋಲು ಕುರುಳಿನ ಲೀಲೆ
ನೂಲುನುಣುಪಿನ ಹಣೆಯು ಕೊಲ್ಲೋ ಕಂಗಳ ಮೇಲೆ.!!
.
. . . . . . ಕವನತನಯ ಸಖ್ಯಮೇಧ

‪#‎ಕೆಂಡಸಂಪಿಗೆ‬

.
ಕಂಗಳೊಳಗಿಹ ಕಣ್ಗೊಳದಲೂ
ಕಂಗೊಳಿಸುತಿದೆ ಕೆಂಡಸಂಪಿಗೆ!
ನೇಹಗಂಧವು ಬಂಧಿಸುತ್ತಿರೆ
ಸೋತು ಹೋಗಿದೆ ಗುಂಡಿಗೆ!!
.
ಮನದ ತಾಣದಿ ಪ್ರೇಮ ಭರ್ತನ
ಅವಳ ನೆನಪಿನ ನರ್ತನ..
ಅವಳ ಮಿಂಚಿನ ನೋಟದಿಂಪನ
ಎನ್ನ ಎದೆಯಲಿ ಕಂಪನ!
.
ಸುರುಳಿಗುರುಳಿನ ಹೊರಳುವಾಟಕೆ
ಗುಳಿಯ ಕೆನ್ನೆಯೂ ಆಟಿಕೆ
ಮಧುವಲದ್ದಿದ ಮುದ್ದು ಅಧರಕೆ
ಮಧುರ ಮುತ್ತಿನ ಕಾಣಿಕೆ!
.
. . . . . . . ಕವನತನಯ ಸಖ್ಯಮೇಧ

‪#‎ಪಾಪು‬

ನೊಸಲಿನೆಸಳಿನ ಮೇಲೆ ಪಸುಳೆವಿಸಿಲದು ಹೊಮ್ಮಿ
ಹಸುಳೆಯಿವಳೀ ಹೆರಳು ಹರಳಕಾಂತಿಯ ಚಿಮ್ಮಿ
ಹಸಿತುಷಾರದ ಸಾರ ಸರಸರನೆ ಪಸರಿಸಿದೆ
ಹೆಸರಿರದ ಹೊಸಬೆಳಕು ಕಿರುಗಣ್ಣಲೊಸರಿದೆ
. . . . . . ಕವನತನಯ ಸಖ್ಯಮೇಧ

ಗುರು

ಮೊರೆವ ತೊರೆಯರೆದೂರ ಸಾರಲು- 
ತೊರೆದು ನೊರೆಹೊರೆಯೊಡಲ ಕಡಲು 
ಮರಳಿ ಸೇರಿತು ತನ್ನ ಗೂಡಿಗೆ; 
ನೀ- ತೆರಳುವೆಂದಿಗೆ ಗುರುವಿನಡಿಗೆ?
.
ನೀಲಬಾನಲಿ ತೇಲುಮುಗಿಲದು 
ಸಾಲುಸಾಲಿನ ಮಳೆಯ ಸುರಿಸಿ;
ಜಲವು ಸೇರಿತು ಮತ್ತೆ ಅಲ್ಲಿಗೆ; ನೀ-
ಅಲೆಯುವೆಂದಿಗೆ ಗುರುವ ನೆಲೆಗೆ?
.
ಬಾಗು ಚಂದ್ರನು, ಕೆಂಪು ಸೂರ್ಯನು
ಸಾಗಿ ಬಂದಿಹ ದಾರಿ ಕಾಣದೆ
ಮಗುಚಿ ಹೋದರೂ ರಾಶಿ ನೀರಲಿ; ನೀ-
ಹೋಗದಿರು ಗುರುವಿರದ ಊರಲಿ!
.
ಹಣತೆ ಉರಿಯಲು, ಗುರಿಯು ಗುರುವಿನ
ಅಣತಿ ಪಡೆಯುತ ಮೆರೆದು ಗೆಲ್ಲಲಿ!
ಕಣಕಣವೂ ಗುರುವೆಂಬ ಶಿಲ್ಪಿಯ
ಚಾಣದೇಟಲಿ ಮೀಯಲಿ !!
.
. . . ಕವನತನಯ ಸಖ್ಯಮೇಧ

ಕೆಂಡಸಂಪಿಗೆ

ಶಾಲ್ಮಲೆಯ ತೀರದಲಿ ನಲ್ಮೆಯಿಂದರಳಿಹುದು
ಕೆಂಡಸಂಪಿಗೆ ಹೂವು ಘಮಲು ಬೀರಿ..
ಕಲ್ಮನವನೂ ಕೊರೆದು ಒಲ್ಮೆಯಲೆಯನು ಹರಿಸಿ
ಹರಿವ ನದೀತೀರ ಹೂವು ಅವಳು- ತೀರಾ ಹೂವು ಅವಳು....

ಕೆಂಡಸಂಪಿಗೆ ಬಳಿಗೆ ಆ ಗಾಢ ಗಂಧ!
ಅವಳ ನೆನಪಿನ ಒಳಗೆ ಅದೆಂಥಾ ಬಂಧ!
ಮಿದುಮೊಗ್ಗು ಅರಳಿ ಸಂಪಿಗೆ ಹೂವು ನಗುವಂತೆ
ಅವಳ ತುಟಿ ಅರಳುತಿರೆ ಅದೆಂಥಾ ಚಂದ!!

ವನದ ಸಂಪಿಗೆ ಕಂಪು ಊರಿನೆದೆಯೊಳಗಿಳಿಯೆ
ಅವಳ ನೆನಪಿನ ತಂಪು ಮನದೊಳಗೆ ಉಳಿಯೆ!
ಬಲುಮಧುರ ಹೂವಂದ, ಅವಳ ಅನುಬಂಧ!
ಕೆಂಡಸಂಪಿಗೆಯೊಡನೆ ಒಡನಾಟದಿಂದ!

ಅವಳೆಂದರವಳಲ್ಲ; ಸಂಪಿಗೆಯು ಹೂವಲ್ಲ;
ಅವರೀರ್ವರೂ ಬೇರೆ ಬೇರೆಯೇ ಅಲ್ಲ!;
ಅವಳುಸಿರೆ ಆ ಘಮಲು, ಸಂಪಿಗೆಯೆ ಅವಳು,
ಕೆಂಡಸಂಪಿಗೆಯೆನಲು ನೆನಪಾಗುವವಳು!!

#‎ಕೆಂಡಸಂಪಿಗೆ‬

ಬಲುಮುದ್ದು ಅವಳದ್ದು ಬಿಳಿಯದ್ದು ಕೆನ್ನೆ;
ಗುಳಿಬಿದ್ದು ನಗುತಿದ್ದರದು ಮುದ್ದೆ ಬೆಣ್ಣೆ!
ಬಳಿಯಿದ್ದು ನೋಡಿದ್ದೆ- ತಿಳಿದಿದ್ದೇ ನಿನ್ನೆ-
ನಾಚಿದ್ದ ಅವಳದ್ದು ಚಿನ್ನದ್ದು ಕೆನ್ನೆ! wink emoticon 
.
. . . . . ಕವನತನಯ ಸಖ್ಯಮೇಧ

‪#‎ಕೆಂಡಸಂಪಿಗೆ‬

‪#‎ಕೆಂಡಸಂಪಿಗೆ‬
'ಅವಳ' ಮನೆಕಡೆ ಬಾಗತೊಡಗಿವೆ
ಕೆಂಡಸಂಪಿಗೆ ಮರಗಳು;
ಅವಳ ಉಸಿರನು ತಾವು ಉಸಿರಿಸಿ
ಹೆಚ್ಚು ಕಂಪನು ಪಡೆಯಲು!
.
ನನ್ನ ಊರಿನ ಕೆಂಡಸಂಪಿಗೆ
ಹೆಚ್ಚು ಬಣ್ಣವ ಸೂಸಿದೆ;
'ಅವಳ' ನಾಚಿದ ಕೆನ್ನೆ ಕಾಣಲು
ತನಗೆ ತಾನೇ ಸೋತಿದೆ!
.
ಕೆಳಗೆ ಉದುರಿದ ರಾಶಿ ಸಂಪಿಗೆ
ನೆಲದಿ ಚಿತ್ರವ ಬರೆಯಿತು;
ಅವಳ ಕೈ ಮದರಂಗಿ ಕಾಣಲು
ಗೆಲುವ ಆಸೆಯ ತೊರೆಯಿತು!
.
ಕೆಂಡಸಂಪಿಗೆ- ಅದರ ಕಂಪಿಗೆ
ಬಿರಿದು ನಕ್ಕಿವೆ ಉಳಿದ ಹೂಗಳು
'ಅವಳ' ನಗುವಿನ ನೆನಪಿನಾಟಕೆ
ಎದೆಯಲರಳಿದೆ ಭಾವಕುಸುಮವು!
.
ಹರಿವ ತೊರೆ,ಕಾನನದ ನಡುವಲಿ
ಕೆಂಡಸಂಪಿಗೆ ವೃಕ್ಷವು!
ತುಡಿವ ಎದೆ, ಮನ ನೆನೆವ ನನ್ನಲಿ
'ಅವಳ' ನೆನಪಿಗೆ ರಕ್ಷೆಯು!
.
. . . . . . . ಕವನತನಯ ಸಖ್ಯಮೇಧ

‪#‎ಸುಂದರಿ‬

.
ಸುಮಸಮ ಅನುಪಮೆ, ಒಲುಮೆಯ ಚಿಲುಮೆ;
ಸುಂದರಿ ಶಮೆ, ರಮೆ, ಸೌಂದರ್ಯ ಸೀಮೆ!
ಸು-ಕುಸುಮ ಕೋಮಲೆ, ಚಂಚಲೆ! ಭಲೆ ಭಲೆ!
ನೀ ನಗುವಿನ ಅಲೆ! ಸನಿಹಕೆ ಬರಲೇ?! wink emoticon tongue emoticon
. . . . . ಕವನತನಯ ಸಖ್ಯಮೇಧ

‪#‎ಕೋರಿಕೆ‬

ಸೊಲ್ಲವಲ್ಲಿಗಳೆಲ್ಲೆಯಿಲ್ಲದೆಯೆ ಹೊರಬರಲಿ-
ಬೆಲ್ಲಮೆಲ್ಲುವ ಸಿಹಿಯ ಓದುಗನಿಗೀದು!
ಮೆಲ್ಲನುಲ್ಲಾಸದಲಿ ಬರೆದೆಲ್ಲ ಸಾಲುಗಳು 
ಸಲ್ಲುತಲಿ ಬಲ್ಲವರ ಮನಗೆಲ್ಲುವಂತೆ!
.
. . . . ಕವನತನಯ ಸಖ್ಯಮೇಧ

‎ಕೆಂಡಸಂಪಿಗೆ‬

ಅರಳುಹೂವಿದೆ ಹೆರಳತಾವಲಿ
ಹರಳಸಾಲಿದೆ ಬೆರಳಮೂಲದಿ
ಇರುಳಗಪ್ಪಿದೆ ಕುರುಳಸುರುಳಿಗೆ
ಕೆರಳಿಸುತ್ತಿದೆ ವಿರಳ ಕಂದೀವಿಗೆ...
.
‪#‎ಕೆಂಡಸಂಪಿಗೆ‬
. . . . . . . . ಕವನತನಯ ಸಖ್ಯಮೇಧ

ಕೆಂಡಸಂಪಿಗೆ‬

ಕೆಂಬಾನು ಮುಸಿನಗಲು ಮುಸ್ಸಂಜೆ ಮುಸುಕಿಹುದು-
ಮುಸಲ ಧಾರೆಯ ಬದಲು ಬಿಸಿಲ ಧಾರೆಯ ಸುರಿಸಿ!;
ಮಸುಕಾಗಿಹುದು ಮನಸು- ಮಾಸಿದಾಗಸದಂತೇ;
ಹುಸಿಮುನಿಸು ತೋರುವವಳೊಡನೆ ಇರದೇನೇ frown emoticon 
.
ಈ ಒಂಟಿ ಸಂಜೆಯೆಂಬುದು ಕುಂಟಿ- ಸಾಗುವುದೇ ಇಲ್ಲ...
.
‪#‎ಕೆಂಡಸಂಪಿಗೆ‬
. . . . . ಕವನತನಯ ಸಖ್ಯಮೇಧ

ಕೆಂಡಸಂಪಿಗೆ‬

ಕೆಂಡಸಂಪಿಗೆ ಘಮಲು -ಉಂಡ ತಂಪಿಗೆ ಅಮಲು
ತುಂಡು ಚಂದ್ರಗೂ ಮರುಳು - ಕಂಡು ಓಡಿದ ಹಗಲು
ದುಂಡುಕಂಗಳ ಹುಡುಗಿ ಮಂಡಿಯೂರಿದಳಿಲ್ಲಿ
ಬಂಡೆಯಂತಹ ಮನವ ಬೆಂಡಾಗಿಸಿದಳಿಲ್ಲಿ..
.
‪#‎ಕೆಂಡಸಂಪಿಗೆ‬

ಕೆಂಡಸಂಪಿಗೆ

ಬಸಿವ ಮಧು ತುಟಿಯಲ್ಲಿ, ಬಿಸಿಯುಸಿರು ಬಳಿಯಲ್ಲಿ
ಬಸವಳಿದ ಮುಂಗುರುಳು ಬೀಸುತಿಹ ಗಾಳಿಯಲಿ
ಬೆಸುಗೆ ಜಡೆಯೆಳೆಗಳಲಿ ಬಿಸುಪಿಹುದು ನಡೆಯಲ್ಲಿ-
ಬೇಸರವು ಕಳೆದಂತೆ ಭಾಸ ಅವಳೆಡೆಯಲ್ಲಿ
.
ಕುರುಳ ಶೇಷವು ಮುಂದೆ, ಉಳಿದ ಕೇಶವು ಹಿಂದೆ
ನಗೆಯ ಪಾಶದ ಜೊತೆಗೆ ಮೆರೆವ ವೇಷದ ಬೆಸುಗೆ
ಸುಮದ ಕೋಶವು ಆಕೆ; ಬಹಳ ಕುಶಲದ ನಾರಿ
ಪ್ರೇಮ ರಾಶಿಯು ಆಕೆ, ಒಲವ ಕಾಶಿಗೆ ನೌಕೆ
.
#ಕೆಂಡಸಂಪಿಗೆ
. . . . . . ಕವನತನಯ ಸಖ್ಯಮೇಧ

bhaarati..

ಮೂರ್ತರೂಪಳು ಆರ್ತರೆದೆಯಲಿ
ಕೀರ್ತಿರೂಪಳು ಪೂರ್ತಿ ಜಗದಲಿ
ಪ್ರಾರ್ಥಿಸಿದವಗೆ ಭರ್ತಿಫಲವನು
ಸ್ವಾರ್ಥವಿಲ್ಲದೆ ನೀಡುವವಳು

ಚುಂಬನ

ತುಂಬಿರುಳು ಚುಂಬನದ ಹಂಬಲವು ತುಂಬಿರಲು
ಬೆಂಬಿಡದ ತುಟಿಬಂಧ ಹೊಂಬೆಳಗವರೆಗೂ
ಕುಂಭದುಂಬುವ ಜೇನು ಚೆಂದುಟಿಗಳಲ್ಲಿ
ಇಂಬು ಸಿಕ್ಕಿದೆ ಸುಖಕೆ ಎಳೆಬಾಹುಗಳಲಿ
.
ಕನಕನಖ ಕೆಣಕುತಿದೆ ಗೀಚುತಲಿ ಬೆನ್ನ
ಕಣಕಣವೂ ಕೆನೆಯೀಗ; ಸಿಹಿದೇಹ ಚೆನ್ನ!
ಮಿಲನದಮಲಿದೆ ಈಗ ಮನದಮೂಲದ ತನಕ
ತುಮುಲ ಕಳೆದಿದೆ ಬೇಗ ಕಳೆದುಹೋಗುವ ತವಕ
.
‪#‎ಕೆಂಡಸಂಪಿಗೆ‬
. . . . . . . . ಕವನತನಯ ಸಖ್ಯಮೇಧ (ಕಾಲ್ಪನಿಕ)

ಮಲೆನಾಡು

ಘನಘನಿತ ಮೇಘ ಘೀಳಿಡುವ ಮಲೆಘಟ್ಟ
ಖಗಮೃಗಗಳ್ನಗುವಾಗ ಮುಗುಳಾಗೊ ಗಿರಿಬೆಟ್ಟ
ಕಲಕಲನೆ ಜಲಸೆಲೆಯು ಮೆಲುಹರಿವ ತಾಣ
ತರುಸಿರಿಯು ಮೆರೆವ ಕಿರಿದಿರುಳ ಹಿರಿದಾಣ

ಕೆಂಡಸಂಪಿಗೆ

ಅವಳಿ ಕನ್ನಡಿ ಅವಳ ಕಣ್ಣ ಜೋಡಿ
ಜವಳಿಯಂಗಡಿ ಅವಳು ನಿಂತರೇ ಮೋಡಿ
ಕವಳಗೆಂಪು ತುಟಿ ಅವಳುಲಿಯುವಳು ಮನಮೀಟಿ
ಬಹಳ ನುಲಿವ ಕಟಿ, ಅವಳಿಗವಳೇ ಸರಿಸಾಟಿ
ಕೆಂಡಸಂಪಿಗೆ
. . . . . . ಕವನತನಯ ಸಖ್ಯಮೇಧ

ನಾ ಕಾಣದ ಹಿಮಾಲಯ

ಹಿಮಧಾರೆ ಹರಿಹರಿದು ಧರೆಪೂರ ಬಿಳಿಸೀರೆ
ರವಿರಾಯ ಗಿರಿಯೇರಿ ನಗೆಬೀರಿ ಮನಸೂರೆ
ಥಳಥಳನೆ ಹೊಳೆಯುತಿದೆ ಬಿಳಿಶಿಖರ ಬಿಸಿಲಿಗೆ
ತಿಳಿಗಾಳಿ ಬಳಿಸುಳಿದು ಕಚಗುಳಿಯು ದೇಹಕೆ
.

. . . . . ಕವನತನಯ ಸಖ್ಯಮೇಧ

ಹ್ಯಾಪಿ ಫ್ರೆಂಡ್ ಶಿಪ್ ಡೇ

ನೋವೊಂದು ನವೆಯಾಗಿ ನವಚಿಂತೆ ಬಲಿತಿರಲು
ನೆವವಿರದೆ ಮನನಾವೆ ನೀರಿನಲಿ ಮಗುಚಿರಲು-
ನವಿರಾಗಿ ಬಳಿಬಂದು "ನಾವಿರಲು ಹೆದರದಿರು"
ಎಂದವರೇ ದೇವರು, ಭುವಿಯಲ್ಲಿ ಸ್ನೇಹಿತರು !
.
ಓ ಸ್ನೇಹಿತ ! ನೀ ನನ್ನ ಹಿತ!
ಜೊತೆಯಲಿರು ಅನವರತ!

ಕೆಂಡಸಂಪಿಗೆ

ಬಿಳಿಕೆನ್ನೆ, ಗುಳಿಚಿನ್ನೆ, ತಿಳಿನಗೆಯ ಮೊಗವನ್ನೆ-
ಬಳಿನಿಂತು ಗಿಳಿಯಂತೆ ನೋಡುತಿಹೆ ನಿನ್ನೇ!
ಇಳಿಬಿದ್ದ ಸುಳಿಗೂದಲೊಡತಿ, ಓ ಗೆಳತಿ!
ಚಳಿಗಾಳಿ ಸೆಳೆಯುತಿದೆ ಬೆಚ್ಚಗಾಗಿಸು ಬಾ!
.
ಕುಳಿತು ಕಳೆಯುವ ಸಮಯ ಕೆಲ ಘಳಿಗೆ ಕಾಲ-
ಅಳಿದ ಹಳೆನೆನಪುಗಳ ಮರುಕಳಿಸುವಾ ಬಾ
ತುಳಿದ ಎಳೆಹುಲ್ಲುಗಳ ಮೇಲಾಟವಾಡುವ ಬಾರೆ
ಮಳೆ ಬಿದ್ದು ಹೊಳೆಯುತಿಹ ಇಳೆಯಂತ
ನೀರೆ...
ಕೆಂಡಸಂಪಿಗೆ
. . . . . . . . ಕವನತನಯ ಸಖ್ಯಮೇಧ

ಕೆಂಡಸಂಪಿಗೆ

ಮೌನದಮನಿ, ಮೃದುಲೆ ಆಕೆ,
ಮನದ ಧಾಮವ ಮೆರೆಸುವಾಕೆ,
ಕುಸುಮಗಂಧಿನಿ, ಮನವಿಹಾರಿಕೆ!
ಹೃದಯಚುಂಬಿತ ಶಿಶಿರಚಂದ್ರಿಕೆ!
.
ಮದಿರೆಗಿಂತಲೂ ಮಧುವು ಮಧುರ
ಅಧರದಾ ಮಧು ಸಿಗಲು ಸದರ
ಎಂದೂ ಆರದ ಕಣ್ಣ ಚಂದಿರ
ಕೆಂಡಸಂಪಿಗೆ ನಿತ್ಯ ಸುಂದರ
ಕೆಂಡಸಂಪಿಗೆ
. . . . . ಕವನತನಯ ಸಖ್ಯಮೇಧ

ಸೀತವ್ವ ಬಸುರಿ....!!

ಪ್ರತಿಮಂದಿ ಊರಲ್ಲಿ ಆಡಿಕೊಂಬರು
ಸಂಜೆ-
ಕೆಳಮನೆಯ ಸೀತವ್ವ ಎಂಬುವಳು ಬಂಜೆ!
ಹರಕೆ, ಹಾರೈಕೆಗಳಿಗಾಗಿಲ್ಲ ಕೂಸು,
ಆಲೈಸುವವರಾರು ಅವಳೊಡಲ ತ್ರಾಸು?!
.
ಆ ದಿನದ ಸುದ್ದಿಯದು-ಸೀತವ್ವ ಬಸುರಿ!
ಊರೊಳಗೆ ಹರಡಿತ್ತು, ಪ್ರತಿ ಕಿವಿಯಲುಸುರಿ!
ಅವರ ಲೆಕ್ಕದಲೀಗ ಕಣ್ದೆರೆದ ದೇವರು!
ಸೀತವ್ವ ನೆಲದ ಮೇಲಿಲ್ಲವೆಂದೆಂಬರು!
.
ಸೀತವ್ವನಿಗೆ ಹಿಗ್ಗು; ಬೆಳೆವ ಹೊಟ್ಟೆಯ
ಕಂಡು!
ಅವಳ ಸೇವೆಗೆ ಈಗ ಊರ ಜನರಾ ಹಿಂಡು!
ಸಿಹಿ ಹುಣಿಸೆ, ಹುಳಿ ಮಾವು, ವಿವಿಧ ಸಿಹಿತಿನಿಸು..
ಅವಳ ಹೊಟ್ಟೆಯಲಿರುವ ಮಗುವಿನದೇ ಕನಸು..
.
ಸೀಮಂತ ಬಂತು ಬಿಡಿ, ಊರಿಗೇ ಪಾಯಸ!
ಆ ಸೊಬಗ ನೋಡುವುದೇ ಕಣ್ಣುಗಳ ಕೆಲಸ!
ಆರತಿಯು ಸಾಕು ಬಿಡಿ, ಉಷ್ಣವಾದೀತು!
ಕಲಶಜಲ ಸೋಕದಿರಿ, ಥಂಡಿಯಾದೀತು!
.
ಸೀತವ್ವ ನಡೆವುದು ಬೇಡ, ಸುಸ್ತು ಬಡಿವುದು ಕೂಸು!
ತುಂಬು ಬಸುರಿಯು ಅವಳು, ಬೇಗ ಕಂಬಳಿ ಹಾಸು!
ಹತ್ತು ವರ್ಷದ ಹರಕೆ ಕೈಗೂಡುತಿದೆ ಈಗ,
ಒಳಗಿಂದ ಗಂಡುಮಗು ಹೊರಗೆ ಬರಲೀ
ಬೇಗ!
.
ಹೋಳಿಗೆಗೆ ಹದ ಹಾಕಿ, ಸೀತವ್ವನಿಗೆ ಬೇನೆ!
ಹೊಸಜೀವದಾಸೆಯಲಿ ನಗುತಿಹುದು 'ಕೆಳಮನೆ'!
ಸುದ್ದಿ ತಂದರು ಯಾರೋ- "ಒಳಗೆಲ್ಲ ನೀರಂತೆ!"
"ಗರ್ಭ ತುಂಬಿದ ನೀರು ಹರಿದು ಹೋಯ್ತಂತೆ!"
. . . . ಕವನತನಯ ಸಖ್ಯಮೇಧ

ಗುರುವೇ...

ಕಡಲದಡದಲಿ ಎಡೆಬಿಡದ ಮೊರೆತ,
ಮೋಡದೊಡಲಲಿ ಕಡುಗುಡುಗಿನ ಕೆನೆತ,
ಕಾಡಡವಿಯಲಿ ಕೂಡುವಾ ಹಕ್ಕಿಜೋಡಿಯ ಉಲಿತ,
ಸುಡುಗಾಡಲಿ ಬಾಡುತಿಹ ಕುಡಿಹುಲ್ಲಿನ ನೆನೆತ-
ನಿನ್ನ ಲಾಲಿಗೆ ಪಲ್ಲವಿ! ಗುರುವೇ!,
ನಿನ್ನ ಕಾಲಿಗೆ ಸಲ್ಲಲಿ!
.
ಮಕರಂದ, ಮಧುಬಿಂದು, ಸಿಹಿನೀರ
ತೊರೆ ಸಿಂಧು,
ಬಿರಿದಿರುವ ಕಸ್ತೂರಿ, ಗಿಳಿಕೊರಳ ತುತ್ತೂರಿ,
ಜಾವದಲಿ ಅವತರಿತ ಹೂವಿನಾ ಸವಿಭಾವ
ನಿನ್ನ ಕಣ್ಣಲೇ ಮುಳುಗಿ ಉದಯಿಸುವ ಚಂದ್ರ!-
ನಿನ್ನ ಹೆಸರಿಗೆ ಅರ್ಪಿತ! ಗುರುವೇ!,
ನಿನ್ನ ಹೆಸರದು ಶಾಶ್ವತ!
.
ಹೊಂಬಿಸಿಲು, ಬಾಂದಳದ ಸಿಂಧೂರ ನಿನಗಾಗಿ,
ಕುಡಿದೀಪ, ನಿಡಿಬಿಸಿಲು, ಸಿಡಿಲಬಳ್ಳಿಯು ಬೆಳಗಿ,
ವಿಶ್ವ ನಿನ್ನೊಳಗಿಹುದು, ನನ್ನೊಳಗೆ
ನೀನು!
ಸಿರಿಸಾರ, ಪರಿಹಾರ, ಮನಮೂರ್ತಿ! ಕೇಳು!
ನೀ ಜಗದ ಗಾನ! ಗುರುವೇ!,
ಒಳಮನದ ಮೌನ!
('ಗೀತಾಂಜಲಿ' ಯ 'ವಾತ್ಸಲ್ಯ' ಗೀತೆ
ಓದಿದಾಗ ಅನಿಸಿದ್ದು,)
. . . . ಕವನತನಯ ಸಖ್ಯಮೇಧ

ಕೆಂಡಸಂಪಿಗೆ

'ಮಧು' ಬೆರೆತ ಮೃದು ಅಧರ
ಮದಭರಿತ ನಗೆ ಮಧುರ
ಮುದವೀವ ಮೊಗಮಂದಾರ
ಮಂದನಡೆ, ಮಾದಕತೆ ಮೈಪೂರ
....................................................
ಎದೆಕದವ ಮೊದಲು ತೆರೆ-
ದಳಿದುಳಿದ ಪ್ರೀತಿಯನು
ಅದಲುಬದಲಾಗಿಸುತ
ಹೃದಯ ಗೆದ್ದವಳಾಕೆ-
ಕೆಂಡಸಂಪಿಗೆ !!

ಕೆಂಡಸಂಪಿಗೆ

ವ್ಯಾಪ್ತಿಯಿಲ್ಲದ ಪ್ರೀತಿ ನಿನ್ನದು
ಪ್ರಾಪ್ತವಾಗಲು ತೃಪ್ತ ನಾನು
ಸುಪ್ತಗನಸಿನ ಆಪ್ತ ಹುಡುಗೀ..
ಗುಪ್ತಮೋಹದ ಲಿಪ್ತ ನಾನು...

( ನಿನ್ನ ಕಂಡು...)
ಸಪ್ತಸರ ಸಂ-ಕ್ಷಿಪ್ತಗೊಂಡಿದೆ
ಎದೆಯ ಸಂಪದ ಜಪ್ತಿಗೊಂಡಿದೆ
ನೂರು ಭಾವವು ವ್ಯಕ್ತವಾಗಿದೆ
ವಿರಹಬಾಧೆಯು ಮುಕ್ತಿ ಕಂಡಿದೆ.

ಮಲೆನಾಡು

ಹಸಿರು ಹುಲ್ಲಿನ ರತ್ನಗಂಬಳಿ, ಬಸಿರು ತುಂಬಿದ
ಮರಗಳೋಕುಳಿ
ಕೆಸರು ನೀರಲಿ ಕಮಲಗಳ ಬಳಿ- ಕೊಸರುತಿಹ
ದುಂಬಿಗಳ ಹಾವಳಿ
ಉಸಿರು ನೀಡುವ ಚಿಗುರು ತರುತಳಿ, ಹೆಸರು ಇಲ್ಲದ
ಹಕ್ಕಿ ಮರದಲಿ
ಆಸರೆಯ ಜೊತೆ ಬಿಳಲ ಕಳಕಳಿ , ಉಸುರುವೆನು-
ಇದು ನಾಕ! ಕೇಳಿ!
.
ಮಲೆನಾಡು_ಮೆಳೆಕಾಡು
. . . . . . . . . ಸಖ್ಯಮೇಧ

ಕೆಂಡಸಂಪಿಗೆ

ಮರಿಗರುವಿನಂಥವಳು ಮರುಬಿರಿದ ತುಟಿಯವಳು
ಮಿರುಮಿರುಗೊ ಮುಖದವಳು ಮಾರಳತೆ ಜಡೆಯವಳು
ಮೋರೆ ತೋರುತ ನಕ್ಕು ಮರೆಗೆ ಸರಿದಳು ಯುವತಿ
ಮೊರೆಕರೆದರಾಲಿಸದ ಮರೆಯಲಾಗದ ಗೆಳತಿ
.
‪#‎ಕೆಂಡಸಂಪಿಗೆ‬
. . . . . . . . . . . . ಸಖ್ಯಮೇಧ

ಮಲೆನಾಡು

ಸುರಗಿ ಸಂಪಿಗೆ ಮಲ್ಲಿ, ನೂರು ಹೂಗಳ ಬಳ್ಳಿ
ಪಾರಿಜಾತವು ಚೆಲ್ಲಿ ವನಕೆವನವೇ ಬೆಳ್ಳಿ!
ಮಲೆನಾಡ ಕಡುಗಾಡಲ್ಲಿ ಇಬ್ಬನಿಯ ರಂಗವಲ್ಲಿ
ಗಿಳಿ ಗುಬ್ಬಿ ಜೊತೆ ಮಿಂಚುಳ್ಳಿ, ಹಕ್ಕಿಗಳ ರಾಗವಲ್ಲಿ
.
‪#‎ಮಲೆನಾಡು_ಮೆಳೆಕಾಡು‬
. . . . . . ಸಖ್ಯಮೇಧ

ಚೆಲುವೆ...

ಬಟ್ಟಲಿನ ಕಣ್ಣುಗಳು ,ಬೆಟ್ಟದಾ ಪರಿ ಚೆಲುವು
ಪುಟ್ಟ ಸಿಂಧೂರ ತಲೆ-ಮಟ್ಟಕ್ಕೆ ಸೆರಗು
ಪಟ್ಟದಾ ರಾಣಿಯಂತಿಟ್ಟಿರುವ ಮೂಗುತಿಯು
ಗುಟ್ಟಾದ ಮುಖಕಮಲ ರಟ್ಟಾದ ವೇಳೆಯಲಿ,,,

ಮೋಹಕ ಚೆಲುವೆಯಾಕೆ,ಮಾಯಕದ ಶಿಲಾಬಾಲಿಕೆ
ನಾನೊಬ್ಬ ಅನುರಾಗಿ, ಈಗಾದೆ ಬೈರಾಗಿ
ತುಸುಸರಿಯಿತು ಸೆರಗು, ನಸುನಕ್ಕಳು ಆಕೆ..
ಮನೆಗೆ ಬರದವಳು, ಮನದಲ್ಲೇ ಉಳಿದಳು..

ಕೆಂಡಸಂಪಿಗೆ

ಸುರಹೊನ್ನೆ ಮರವನ್ನೆ ಕೇಳಿದೆನು ನಾ ನಿನ್ನೆ-
ಕೆಂಡಸಂಪಿಗೆಯಂತೆ ಹೆಚ್ಚು ತಂಪು!
ಗಂಧದಾ ಮರ ಕೂಡ ಅಂದಿತ್ತು ಚಂದದಲಿ-
"ಕೆಂಡಸಂಪಿಗೆಗೇನೆ ಹೆಚ್ಚು ಕಂಪು"!!

‪#‎ಕೆಂಡಸಂಪಿಗೆ‬
. . . . . . . . ಸಖ್ಯಮೇಧ

ಕೂಸಿನ ಕುರಿತು

ಜಗದಗಲ ಮೆರೆವಂತ ಮುಖಕಮಲ ನಿನ್ನದು
ಅತಿಮೃದುಲ ಕಣ್ಣುಗಳು, ಕಿಲಕಿಲನೆ ನಗುವವಳು
ಹೊಂಗೂದಲದು ಚೆನ್ನ, ನಗೆಗೆ ಸಾವಿರ ಬಣ್ಣ
ಎತ್ತಿಕೊಳುವಾಸೆ, ಮುಗ್ಧ ಅಂದದ ಕೂಸೇ..

ಮಲೆನಾಡು

ವಿಪುಲ ಹೂಫಲವೀವ ಸುಫಲ ಸಹ್ಯಾದ್ರಿ
ಹಂಪಲಿನ ತಂಪೆರೆವ ಸಂಪನ್ನೆ, ಧಾತ್ರಿ!
ಸರ-ಸರೋವರ ಸಾರ ಸಾಕಾರೆ, ಮೈತ್ರಿ!
ಸುಮ ಘಮದಮಲಲಮಿತ ಮೆರೆವ ಧರಿತ್ರೀ !
.
‪#‎ಮಲೆನಾಡು_ಮೆಳೆಕಾಡು‬
. . . . . . . ಸಖ್ಯಮೇಧ

ಕೆಂಡಸಂಪಿಗೆ

ಹೆಜ್ಜೇನ ಮೈಬಣ್ಣ ಮಜ್ಜನದ ಮೈಕಾಂತಿ
ಲಜ್ಜೆ ತುಂಬಿದ ನೋಟ ಹೆಜ್ಜೆ ನವಿಲಿನ ಆಟ
ಸಜ್ಜುಗೊಂಡಿಹ ಮೊಗವು ಹೆಜ್ಜಾಲ ಮುಂಗುರುಳು
ಕಜ್ಜಾಯದಂಥ ತುಟಿ ಸಜ್ಜೆಮನೆ ಹುಡುಗಿಗೆ...
....ಕೆಂಡಸಂಪಿಗೆ

— feeling naughty.

ಅವಳು

ಬೆಳಕು ಹೀರಿದ ಹುಡುಗಿ, ಬಡಗಿ ಕೆತ್ತಿದ ಬೆಡಗಿ
ತುಳುಕಿ ಚೆಲ್ಲುವ ಹೆರಳು, ಬಳುಕಿ ನುಲಿಯುವ ಬೆರಳು
ತಳುಕು ಹಾಕುವ ಪಾದ, ಘಿಲಕು ಗೆಜ್ಜೆಯ ನಾದ
ಪುಳಕ ಬೀರುವ ದೃಷ್ಟಿ, ಚಳಕ ನಿನ್ನಯ ಸೃಷ್ಟಿ
.
ಕೆಂಡಸಂಪಿಗೆ
. . . . . . . . ಸಖ್ಯಮೇಧ

ಬೆರಗು

ಹಿಗ್ಗು ತುಂಬಿದ ಕಣ್ಣ ಹುಬ್ಬು-
ಸುಗ್ಗಿ ಸಂಭ್ರಮ ಕೂಡ ಮಬ್ಬು!
ಲಗ್ಗೆಯಿಡು ಬಾ, ತೊರೆದು ಕೊಬ್ಬು
ಮಗ್ಗುಲಲಿ ಮಲಗುವೆನು, ತಬ್ಬು
.
ಕೆಂಡಸಂಪಿಗೆ
. . . . . . . . . . . ಸಖ್ಯಮೇಧ

ನೀನು...

ನೀನೊಂದು ಸಾಹಿತ್ಯ, ನನ್ನೆದೆಯ
ಲಾಲಿತ್ಯ
ಅತಿಮಧುರ ಸಾಂಗತ್ಯ, ಈ ಪ್ರೀತಿ ಸಿಹಿಸತ್ಯ
ಬೆರಳುಗಳ ದಾಂಪತ್ಯ, ನಡೆಸೋಣ ಪ್ರತಿನಿತ್ಯ
ನೀ ಬದುಕಿನಾಗತ್ಯ, ಈ ಬಂಧವೇ ಅಂತ್ಯ
.
ನಿನ್ನ ಕಂಗಳ ನೃತ್ಯ, ನನ್ನ ಕಣ್ಣಿಗೆ ಭತ್ಯ
ತುಂಟ ಕೂದಲ ಕೃತ್ಯ, ನನ್ನೆದೆಗೆ ಆತಿಥ್ಯ
ಕೇಶನಿಯಮದ ರೀತ್ಯ, ಆ ಜಡೆಯ ಸಾರಥ್ಯ
ನೀನಿರದ ಮನ ಮಿಥ್ಯ, ನೀ ಸಿಗಲು
ಕೃತಕೃತ್ಯ
.
ಕೆಂಡಸಂಪಿಗೆ

. . . . . . . . . ಸಖ್ಯಮೇಧ

ಕನ್ನ

ಕನ್ನಹಾಕುವ ಕಣ್ಣಸನ್ನೆಯು
ಖಿನ್ನಗೊಳಿಸುವ ಕೆನ್ನೆಬಣ್ಣವು
ಬೆನ್ನಮೇಲ್ಗಡೆ ಚಿನ್ನದಾ ಜಡೆ
ಹೊನ್ನತೇಜದ ನಗುವ ಮುನ್ನಡೆ...
.
ಮೆಲ್ಲನಾಚಿದೆ ಬೆಳ್ಳಗಲ್ಲವು
ಎಲ್ಲನೋಟದ ಕಳ್ಳಬಿಂದುವು
ಎಲ್ಲೆ ಮೀರದ ಚೆಲ್ಲುಮಾತಿಗೆ
ಕಲ್ಲು ಹೃದಯವೂ ಹಲ್ಲೆಗೊಂಡಿದೆ...

ಕೆಂಡಸಂಪಿಗೆ
. . . . . . . . . . ಸಖ್ಯಮೇಧ

ಅವಳೆಂದರೆ...

ಅರೆ...!
.
ಸೂರ್ಯ ಪಶ್ಚಿಮಕ್ಕಿದ್ದಾನೆ,
ಸೂರ್ಯಕಾಂತಿಯ ಮುಖ ಪೂರ್ವಕ್ಕೆ...!!
.
ಓ...!! ಪೂರ್ವಕ್ಕೆ ನನ್ನವಳು ನಿಂತಿದ್ದಾಳೆ..!

ಕೆಂಡಸಂಪಿಗೆ

ಕೆಂಡಸಂಪಿ...

ಕೆನ್ನೆ ಕಿತ್ತಳೆ, ಕತ್ತು ಬೆತ್ತಲೆ
ಮುಖವು ನೈದಿಲೆ, ಒಮ್ಮೆ ಮುಟ್ಟಲೆ?
'ನತ್ತು' ನಕ್ಕರೆ ಹೊಳೆವಳವಳೇ
ಅಧರ ಅದುರಿರೆ ಮುತ್ತಿನಾಹೊಳೆ..
.
ಹತ್ತುಸುತ್ತಿನ ಒತ್ತು ಜಡೆಯು
ಗತ್ತು ತುಂಬಿಹ ಸುತ್ತು ನಡೆಯು
ಒತ್ತಿ ತೀಡಿದ ಅಚ್ಚ ಕಾಡಿಗೆ
ಅತ್ತರಿನ ಘಮ ಮತ್ತೂ ಸನಿಹಕೆ...
.
ಕೆಂಡಸಂಪಿಗೆ

ಹೂಮೊಗ

ಏಯ್ ಚಿಟ್ಟೆ...!!

ನಿಲ್ಲು...!!

ಅದು ಹೂವಲ್ಲ, ನನ್ನವಳ ಮೊಗ...!!

ಕೆಂಡಸಂಪಿಗೆ

ಹಂಬಲ

ಗೊಂದಲದ ಹುಡುಗಿಯೇ,
ಹಂಬಲದ ಹುಡುಗ ನಾ,..
ಚಂಚಲವ ಬದಿಗಿಟ್ಟು
ಸಂಚಲನವಾಗು ಬಾ...
___________
ನಿನ್ನ ನೆನಪಾಗಿ ಒಲೆ ಮೇಲಿರುವ ಅನ್ನದ ಪಾತ್ರೆ ಮೇಲಿನ
ಬಟ್ಟಲಿನಂತಾಡುತ್ತದೆ ಮನಸ್ಸು... ನಿನ್ನ ನೆನಪು
ತೀವ್ರವಾಗಿ ಅದರಲ್ಲೇ ಮುಳುಗಿದಾಗಲೇ ಅದು ಮತ್ತೆ
ಸ್ಥಿಮಿತಕ್ಕೆ ಬರೋದು..
ಕೊನೇ ಬಾರಿ ಸಿಕ್ಕಾಗ ಏನನ್ನು ಬಿಟ್ಟು ಹೋದೆಯೋ
ಗೊತ್ತಿಲ್ಲ.. ಸಂಪಿಗೆಯ ಘಮ ಮೂಗಿಗೆ
ಬಡಿದಾಗಲೆಲ್ಲ ನಿನ್ನದೇ ನೆನಪು..
ನಿಜ ಹೇಳ್ತೀನಿ, ಆ ನಿನ್ನ ಮುಖವನ್ನು ಸರಿಯಾಗಿ
ನೋಡಬೇಕೆಂದು ಎಷ್ಟೋ ಬಾರಿ
ಅಂದುಕೊಂಡಿದ್ದೇನೆ..
ನೀ ಸಿಕ್ಕಾಗಲೆಲ್ಲ ಮನಸ್ಸು ಗೊಂದಲದ
ಗೂಡಾಗಿ ಏನಾಗುವುದೋ ನನಗೇ ತಿಳಿಯುವುದಿಲ್ಲ..
ಆ ಮುಖವನ್ನು ಸರಿಯಾಗಿ ನೋಡಿಬಿಟ್ಟರೆ ಎಲ್ಲಿ ನನ್ನ
ಎದೆಬಡಿತ ನಿನಗೂ ಕೇಳಿಬಿಡುವಷ್ತು ಹೆಚ್ಚುವುದೋ ಎಂಬ
ಆತಂಕ... ಕನಸಿನಲ್ಲೂ ನಿನ್ನ ಮುಖದ ನಬದಲು
ಮುಂಗುರುಳು ಕಾಣುವುದೇ ಹೆಚು..
�
ಕೆಂಡಸಂಪಿಗೆ

ಪರಿಸರ

ಅವಸಾನದ ವಸನ ಹೊತ್ತು
ಪ್ರಹಸನದ ವ್ಯಸನಕಂಜಿ
ಮಸಣದೆಡೆಗೆ ವದನವಿಟ್ಟು
ನಸುನಲುಗಿದೆ ಪರಿಸರ...

ಹಸನಾಗುವ ಕನಸ ತೊರೆದು
ಮುಸಿನಗುತಿಹ ಮನಸ ಶಪಿಸಿ
ಹಸೆಯೇರುವ ವಧುವಿನಂತೇ
ಚಿತೆಯೇರಿದೆ ಪರಿಸರ...

— feeling ಪರಿಸರ ಉಳಿಸಿ...

ಬಳ್ಳಿ

ಕೆಂಡಸಂಪಿಗೆ
↓
ನ ಗುವ ಹವಳವು ಅವಳ ಕಂಗಳು
ನಾ ದ ಸೂಸುವ ಬಳೆಯ ಕೈಗಳು
ನಿ ಯತ ಹಾರುವ ಮುದ್ದು ಮುಂಗುರುಳು
ನೀ ಳ ಮೂಗಿನ ಕೆಳಗೆ ಮುಗುಳು
ನು ರಿತ ಕಂಗಳ ಒಳಗೂ ನಾಚಿಕೆ
ನೂ ರು ಬಿಮ್ಬದ ಮರಿ ಮರೀಚಿಕೆ
ನೆ ಪವೇ ಇಲ್ಲದೆ ನಾಚುವಾ ಮೊಗ
ನೇ ಮ ತಪ್ಪದ ಕೂದಲೇ ಸೊಗ
ನೈ ದಿಲೆಯು ಸಹ ನಾಚಿತೀಗ
ನೊ ಸಲ ಮೆಗಡೆ ಮುಡಿದ ಹೂವು
ನೋ ಡಿ ಖುಷಿಯಲಿ ಕುಣಿದ ಮನವು
ನೌ ಕೆಗೊಬ್ಬನೇ ಇರುವ ನಾವಿಕ
ನಂ ಟಿಲ್ಲವೆನಗೆ ನಿನ್ನ ಬಳಿಕ , ನಿನ್ನ ವಿ-
ನಃ ಎಲ್ಲ ನರಕ....

. . . . ಸಖ್ಯಮೇಧ

ಕೆನ್ನೆ

ಆ ಮುದ್ದು ಬಿಳಿಗೆನ್ನೆ
ಬೆಲ್ಲ ತುಂಬಿದ ದೊನ್ನೆ
ಮರುಕಳಿಸೋ ಕಣ್ಸನ್ನೆ
ಅವಳೀಗ ಮನದನ್ನೆ...

ಮೋಹವೋ ದಾಹವೋ ಸಹವಾಸ ಬೇಕಿದೆ
ದೇಹಕ್ಕೂ ನೇಹಕ್ಕೂ ಮಧುಮೇಹ ಬಂದಿದೆ
ಹುಸಿಕಲಹ ಹೆಚ್ಚಿದೆ, ತುಸು ಸನಿಹ ಬಾ ಎಂದು
ಮುಸಿನಗುತ ಓಡದಿರು ಮನಸಿಂದು ಬೇಡಿದೆ...
‪#‎ಕೆಂಡಸಂಪಿಗೆ‬
. . . . . . . ಸಖ್ಯಮೇಧ

— feeling naughty.

ಕೆಂಡಸಂಪಿಗೆ

#‎ಪುರಾ_ನಾರೀ_ಪ್ರೇಮಧಾರೀ‬
ಕುಳಿರುಗಾಳಿಯ ತಂಪು ದನಿಯಲಿ
ಹೃದ್ಯವಾಗಿದೆ ಅವಳ ಪದ್ಯವು
ನೀರಧಾರೆಯ ಮಂದ ನಾಟ್ಯದಿ
ನಿತ್ಯ ಕಂಡಿದೆ ಅವಳ ನೃತ್ಯವು…..

ತೂಗುತಿಹ ಹೆಜ್ಜೇನ ಹಿಂಡು
ನಾಚಿಕೊಂಡಿದೆ ಅಧರ ಕಂಡು
ಶಿಶಿರಕಾಲದ ತುಂಬು ಚಂದ್ರನ
ಮರೆಯಮಾಡಿದೆ ಹಣೆಯ ಚಂದನ….

ಸಾಲು ಶ್ರೇಣಿಯ ರಜತ ಪರ್ವತ-
ದಂತೆ ಕಂಡಿದೆ ದಂತ ಪಂಕ್ತಿಯು
ಕಿವಿಯ ಲೋಲಕ ಬಹಳ ಮೋಹಕ
ಮನದಿ ಹೊಮ್ಮಿದೆ ಭಾವ ಸೂಕ್ತಿಯು….

‪#‎ಕೆಂಡಸಂಪಿಗೆ‬ ನಕ್ಕ ವೇಳೆಗೆ
ಮಿಕ್ಕ ಹೂಗಳು ಪಕ್ಕ ಸರಿದವು
ಚಿಕ್ಕ ಹೃದಯದಿ ಪುಕ್ಕ ಪಡೆಯಿತು
ಪ್ರೇಮಹಕ್ಕಿಯು ನಕ್ಕು ನಲಿಯಿತು…
#ಕೆಂಡಸಂಪಿಗೆ

ಸ್ಪೃಹಾ

#‎ಸ್ಪೃಹಾ‬

ಕಣ್ ಬದಿಯ ಕಾಡಿಗೆಯು
ನಡುವೆ ಹೊಳೆಯುವ ಕಣ್ಣು
ಕಾರಿರುಳ ರಾತ್ರಿಯಲೂ
ಚಂದ್ರ ಬಂದಂತೆ....

ಶಶಿಮುಖಿಯ ಕೊರಳಲ್ಲಿ
ಹೊಳೆವ ಚಂದದ ಸರವು
ಜೋತುಬಿದ್ದಿಹ ಪದಕ
ದಿನಕರನ ತುಣುಕು ....

ಕೈಬಳೆಯ ಮೇಲಿರುವ
ಆ ಸಾಲು ಚುಕ್ಕಿಗಳು
ರಾತ್ರಿ ಕಾನನದಲ್ಲಿ
ಮಿಂಚುಹುಳ ನಕ್ಕಂತೆ,..

ಕೈಯಲ್ಲಿ ಕಳೆದುಂಬಿ
ಕಾಣುತಿದೆ ಮದರಂಗಿ
ಚದುರಂಗವಾಡೋಣ
ಕೈ ಮೇಲೆ ಮುದ್ದಾಗಿ...

‪#‎ಕೆಂಡಸಂಪಿಗೆ‬

. . . . . . . ಸಖ್ಯಮೇಧ

ಮುದ್ದು ಮುಖ

ಆ ನೀಳ ಮುಂಗುರುಳು
ಗಾಳವನು ಹಾಕಿದೆ
ತಾಳ ತಪ್ಪಿದ ಮನವು
ಅದಕೆ ವಶವಾಗಿದೆ...

ಮುದ್ದಾದ ನುಣುಪಾದ
ಅವಳ ಮೂಗಿನಮೇಲೆ
ಜಾರುಬಂಡಿ ಆಡುತಿದೆ
ಹುಚ್ಚು ಕನಸು...

ಮೃದುವಾದ ಕಿವಿಯೆಂಬ
ಅಂದದಾ ಬಾವಿಯೊಳು
ಬೀಳಬೇಕೆನ್ನುತಿದೆ
ಎದೆಯ ಉಸಿರು ....

ಚಂದದಾ ಕೈ ನೆನೆದು
ಕೆನ್ನೆ ಕೆಂಪಾಗಿದೆ...
ಕೈತುತ್ತು ತಿನುವಾಸೆ
ಹಸಿವು ಹೆಚ್ಚಾಗಿದೆ...

'ಮುತ್ತಿನ' ಹಾರವನು
ತೊಡಿಸಲೇ ಕೊರಳಿಗೆ..
ಅಪ್ಪುಗೆಯ ಬಹುಮಾನ
ಕೊಡಲೇನು ಆ ಜಡೆಗೆ...

ಅ....
ಅಯ್ಯೋ !! ಸಾಕು ಸಾಕು...  

‪#‎ಕೆಂಡಸಂಪಿಗೆ‬
. . . . ಸಖ್ಯಮೇಧ

ನೀರಡಿಕೆ

ಕುಡಿಕೆ ನೀರಿನ ಮಡಿಕೆ
ಭಾರವಾಯಿತು ದಡಕೆ
ನೀರಸೆಲೆಯಾ ನದಿಗೂ
ಈಗ ನೀರಡಿಕೆ...

ಮನವು ಭಾರ, ಬಯಕೆ ದೂರ
ಚೈತ್ರದಲ್ಲೂ ಮನದ ಮರ್ಮರ
ಇಲ್ಲ ಭರವಸೆ, ಎಲ್ಲ ತತ್ತರ
ಮನದ ಮಾರ್ಗದಿ ದೊಡ್ಡ ಹಂದರ

ಮಾಯಕದ ‪ಕೆಂಡಸಂಪಿಗೆ‬
 . . . . . . .  ಸಖ್ಯಮೇಧ

ಯುಗಾದಿ

ಎಂದೆಂದೂ ಮುಗಿಯದೀ ಹಾದಿ
ಯಾವತ್ತೂ ಮಾಗದೀ ಯುಗಾದಿ
ಗರಿಗೆದರಿವೆ ಕನಸುಗಳು ಮನದಿ
ನನಸಾಗಲಿ ಮನ್ಮಥನ ಹಸ್ತದಿ

ಹೊಸವರುಷದ ಹಾರ್ದಿಕ ಶುಭಾಶಯಗಳು 

— celebrating ಯುಗಾದಿ

ಅವಳೆಂದರೆ...

ಮಳೆಬರುವ ಮೊದಲಕ್ಷಣ
ಆಗಸವ ತುಂಬಿರುವ
ಮೇಘಗಳ ಗಾಂಭೀರ್ಯ
ಅವಳ ನಡೆಯಲ್ಲಿ...

. ಮಂಜಿನಲೂ ತಾನರಳಿ
. ಅಂಜದೆಯೇ ಘಮ ಬೀರಿ
. ಮುದ ನೀಡುವಾ ಸುಮವು
. ಅವಳ ಕಣ್ಣಂತೆ...

ಬಾನೆತ್ತರಕೆ ಬೆಳೆದು
ತಂಪು ನೆರಳನ್ನೀಯ್ವ
ಹೊಂಗೆ ವೃಕ್ಷದ ತರಹ
ಭರವಸೆಯ ಕಣ್ಣು...

. ಫಲಭರಿತ ಹೊಸದೊಂದು
. ಮರವೊಂದ ಕಂಡಾಗ
. ಹಕ್ಕಿಗಳು ನಕ್ಕಂತೆ
. ಬಳೆಯ ಸದ್ದು...

ಹಸಿರು ಗದ್ದೆಯ ನಡುವೆ
ಬೀಸುಗಾಳಿಯು ಹಾದು
ತೆನೆ ಬಳುಕಿ ನಕ್ಕಂತೆ
ಅವಳ ಮುಂಗುರುಳು...

. ಅತ್ತಿತ್ತ ಓಡಾಡಿ
. ಪೆದ್ದಾಗಿ ಕುಣಿಯುತಿಹ
. ಎಳೆಗರುವಿನಂತಹುದೇ
. ಮುಗ್ಧ ಮನಸು...

‪‎ಕೆಂಡಸಂಪಿಗೆ‬
. . . . . . ಸಖ್ಯಮೇಧ

ಚಂದಿರ

ಗೆಳತೀ ....,
ಆಕಾಶದಲ್ಲಿ ನಿನ್ನ
ಮುಖದ ಬಿಂಬ
ಪ್ರತಿಫಲನಗೊಂಡಿದೆ...
ಮತ್ತು
ಜನರು ಅದನ್ನು
ಚಂದಿರನೆನ್ನುತ್ತಾರೆ...

‪‎ಕೆಂಡಸಂಪಿಗೆ‬

ಇಚ್ಛೆ

ಹುಚ್ಚು ಪ್ರೀತಿಯ ಇಚ್ಛೆ ಹೆಚ್ಚಳ
ಮುಚ್ಚುಮರೆಯಲಿ ಆಸೆ ನಿಚ್ಚಳ....
ಒಲವ ಸೀಸೆಗೆ ನಗೆಯ ಮುಚ್ಚಳ
ಬಿಚ್ಚಿ ತೆರೆದರೆ ಪ್ರೀತಿ ಸಪ್ಪಳ..

ಸ್ವಚ್ಛ ಒಲವಿನ ಭಾವ ಹೆಚ್ಚಿದೆ
ಹೊಚ್ಚ ಹೊಸ ಅನುಭೂತಿ ಮೆಚ್ಚಿದೆ...
ಎದೆಯ ಕಿಚ್ಚಿಗೆ ತಂಪು ಹಚ್ಚುವ
ನಗೆಯ ಗುಚ್ಛವ ನೆಚ್ಚಿದೆ...

ತುಚ್ಛ ಕೃತಿಗಳು ಬೆಚ್ಚಿಬಿದ್ದಿವೆ
ಹಚ್ಚ ಹಸಿರಿನ ಪ್ರೀತಿ ಕಂಡು....
ಕೆಚ್ಚಿನಲಿ ಚುಚ್ಚುವಾ ಬಯಕೆಯು
ಇಚ್ಛೆಯಿಲ್ಲದ ಮಿಥ್ಯೆಗಳನು...

ಹಳೆಯ ಯೋಚನೆ ನುಚ್ಚುನೂರು
ಹಳೆಯ ಕಿಚ್ಚಿಗೆ ಬಿತ್ತು ನೀರು...
ಅಚ್ಚ ಪ್ರೀತಿಗೆ ವೆಚ್ಚ ಇಲ್ಲ
ಬಿಚ್ಚು ಮನಸಿನ ನುಡಿಯೇ ಎಲ್ಲ...

# ಕೆಂಡಸಂಪಿಗೆ
. . . . ಸಖ್ಯಮೇಧ
(ಕೃತಿ= ಕಾರ್ಯ ಎಂಬರ್ಥದಲ್ಲಿ ಬಳಸಲಾಗಿದೆ.
ಹಾಗೂ ಸಂಬಂಧಗಳು ಎಂಬರ್ಥದಲ್ಲಿ
ಕೊಂಡಿ ಪದ ಬಳಸಿದೆ.)

ಸಂಗ

ಚಂದ ನಿನ್ನಯ ಸಂಗ
ತಂದ ಸುಖದುತ್ತುಂಗ ;
ಸಾಂಗತ್ಯ ದೊರೆತರೆ ಬೇಗ
ಪ್ರೀತಿ ಸಂಗತಿ ಸಾಂಗ...
ಸಂಗಾತಿ ನೀ ಕರೆದಾಗ
ಸನಿಹಕ್ಕೆ ಬಾ ಎಂದಾಗ
ಪ್ರೇಮಸೌಧದ ಶೃಂಗ
ತಲುಪಿ ನಕ್ಕೆನು ಆಗ...
ಕಂಗಳಲಿ ನೀರಿಳಿದಾಗ
ನೀ ತುಂಬ ದೂರಾದಾಗ
ಎದೆನಡುಗಿ ಮನಸಿಗೆ ರೋಗ
ಒಲವ ಭಾವದ ಭಂಗ...
ಮಾಯಕದ #ಕೆಂಡಸಂಪಿಗೆ
. . . . . .ಸಖ್ಯಮೇಧ

ಜೊತೆ

ಕೆಂಪು ರಂಗೇರಿದೆ ಗಗನ
ತಂಪು ತಂಗಾಳಿಯ ಗಾನ
ಮಂಪರಿನ ಸವಿಸಂಜೆ ಯಾನ...
ಕಂಪೆರೆವ ಹಳೆನೆನಪ ಮನನ...
.
ಆಸರೆಗೆ ತರುಲತೆಗೆ ಮರವು ಇರಬೇಕು..
ಕುಸುಮಕ್ಕೆ ಭ್ರಮರದಾ ಸ್ಪರ್ಶವಿರಬೇಕು...
ನೇಸರನು ತೊಲಗಿದರೆ ಚಂದಿರನು ಬರಬೇಕು..
ಬೇಸರವು ಬಂದಾಗ ನಿನ್ನ ಜೊತೆ ಬೇಕು...
ಮಾಯಕದ # ಕೆಂಡಸಂಪಿಗೆ
. . . . . . ಸಖ್ಯಮೇಧ

ಅಮಾವಾಸ್ಯೆ

ಅಯ್ಯೋ ...!!
ಚಂದ್ರ ಕಾಣೆಯಾಗಿಬಿಟ್ಟಿದ್ದಾನೆ..!!
ಗೆಳತೀ .....
ಹುಡುಕಲೇನು...
ನಿನ್ನ ಕಂಗಳಲ್ಲಿ......!!

ಕೆಂಡಸಂಪಿಗೆ

ಅಮಾವಾಸ್ಯೆ

ಬಳ್ಳಿ...

ಕ ದಪುಗಳು ಕೆಂಪೇರಿ ನೀ ನಾಚಿ ನಗುವಾಗ
ಕಾ ಲಲ್ಲೇ ನಿಂತಲ್ಲೇ ರಂಗೋಲಿ ಬರೆವಾಗ
ಕಿ ರಿದಾದ ನಗುವೊಂದು ಕಣ್ಣಲ್ಲಿ ಕಂಡಾಗ
ಕೀ ಲಿಕೈ ನೀನಾದೆ ಪ್ರೀತಿ ಬಾಗಿಲಿಗೆ....
ಕು ಶಲತೆಯ ಆ ಮಾತು, ಕೇಳುವಿಕೆಗಿಂಪು..
ಕೂ ತಲ್ಲಿ ನಂತಲ್ಲಿ ನಿನ್ನದೇ ನೆನಪು...!
ಕೆ ತ್ತಿಹೆನು ಎದೆಯಲ್ಲಿ ನಿನ್ನ ಹೆಸರನ್ನು ..
ಕೇ ಳಿಲ್ಲಿ ಒಂದುಕ್ಷಣ ಎದೆಬಡಿತವನ್ನು...
ಕೈ ಗೂಸಿನಂತೆಣಿಸಿ ಪ್ರೀತಿಸುವೆನು...
ಕೊ ರಗು ಕರಗಿಸು,
ಪ್ರೀತಿಸೌಧವನು ನೀ ಕಟ್ಟು
ಕೋ ರಿಕೆಯ ಒಪ್ಪಿ ಬಂದಪ್ಪಿ ಸಂತೈಸು...
ಕೌ ತುಕವ ಬದಿಗಟ್ಟಿ ಪ್ರೀತಿ ಸಾಲವ ನೀಡು
ಕಂತುಕಂತುಗಳಲ್ಲಿ ತೀರಿಸುವೆ-ಮುತ್ತುಗಳ..!!
ಕಹಿಬದುಕ ಸಿಹಿಗೊಳಿಸು, ಬಂದುಬಿಡು ನೀ...

ಕೆಂಡಸಂಪಿಗೆ

. . . . . . ಸಖ್ಯಮೇಧ

ಬಾಹುಬಂಧನ

ಬಾಹುಬಂಧನ - ಅದುವೆ - ಭಾವಬಂಧನ!!
ತನುವ ಮಂಥನ-ಮನವು- ನಂದನವನ..!
ಮನದ ಮಿಲನ-ಚಂದ - ಮಂತ್ರಸಮ್ಮೋಹನ..
ನಿನ್ನ ಮನನ- ಹೊಸತು ಭಾವ ಜನನ...!!

ಕೆಂಡಸಂಪಿಗೆ

. . . . . . ಸಖ್ಯಮೇಧ

ಭಾವಾಮೃತ

ಭಾವಾಮೃತವೇ....,

ಚಂದದಾ ಹಣೆಮೇಲೆ ದುಂಡುಬಿಂದಿಯನಿಟ್ಟು
ಕಣ್ಣಲ್ಲೇ ನೀ ನಾಟ್ಯವಾಡುವಾಗ..
ಮುದ್ದುಕ್ಕಿ ಬಂದಿತ್ತು ಭಾವಬಿಂದಿಗೆ ತುಂಬಿ-
ವಾತ್ಸಲ್ಯದಾ ಪ್ರಸವ - ಮನ ಬೀಗಿದಾಗ..!
.
ಪುಟ್ಟಮೂಗಿನ ಮೇಲೆ
ಪಟ್ಟದಾ ಮೂಗುತಿ..
ಪಟ್ಟಕದ ರೀತಿಯಲಿ ಹೊಳೆಯುವಾಗ..
ತುಟ್ಟಿಯಾಯಿತು ಪ್ರೀತಿ; ಕಣ್ಕಟ್ಟಿತೂ ಬೆಳಕು
ಎದೆತಟ್ಟಿ ಒಲವ ಮನೆ ಕಟ್ಟುವಾಗ...!
.
ಅಡಗಿ ಕುಳಿತಿಹ ಕಿವಿಯ
ಬೆಡಗ ಬಣ್ಣಿಸಲೆಂದು
ಮಡಗಿದಾ ಒಡವೆಯಿದು ಕಿವಿಯೋಲೆ ಕಾಣು..!
ಬಿಡುವು ಆದಾಗೆಲ್ಲ ಕೈಯಿಡುತ ಮುಂಗುರುಳ
ಸಡಿಸುತಲಿ ಕಿವಿ ಮೇಲೆ ಇಡುತಲಿರು ನೀ..!
.
ಮಲ್ಲಿಗೆಯ ಹೊತ್ತು ತಾ ಚೆಲ್ಲಾಟವಾಡುತಿಹ
ಜಡೆಯ ಪಲ್ಲಟ ನಿಮಿಷನಿಮಿಷಕೊಮ್ಮೆ..!
ಗಲ್ಲದಾ ಬೊಟ್ಟಿಗೂ ಇಲ್ಲಿರುವ ಕೂದಲಿಗೂ
ಸಲ್ಲುತಿದೆ ಅಚ್ಚು ಕಲ್ಗಪ್ಪು ಬಣ್ಣ..!
....
ಲಜ್ಜೆಗೆಂಪಿನ ಹಿಮ್ಮಡದ
ಮೇಲ್ಜೋತುಬಿದ್ದಿಹ ಗೆಜ್ಜೆಯು..!
ಮುಚ್ಚುಮರೆಯಲಿ ಹುಚ್ಚು ಹಿಡಿಸಿದೆ
ಇಚ್ಛೆ ಹೆಚ್ಚಿದೆ ಮನದಲಿ..!
.
ಕೆಂಡಸಂಪಿಗೆ ...

. . . . . . ಸಖ್ಯಮೇಧ

ಬಳ್ಳಿ

ಅ ನುದಿನವೂ ಹಳೆ ನೆನಪು
ಆ ಕರ್ಷಣೆಯ ಹೊಳಪು
ಇ ರುಳಲ್ಲೂ ನಿನ್ನ ನೆನೆವ
ಈ ಪರಿಯ ಹೊಸ ಹುರುಪು
ಉ ಸಿರಲ್ಲೂ ನಿನ್ನತನ
ಊ ನವಾಗಿಹುದು ಮನ
ಎ ಲ್ಲಿ ದೂರಾಗಿರುವೆ
ಏ ತಕ್ಕೆ ಅಡಗಿರುವೆ
ಐ ಕ್ಯವಾಗುವ ಬೇಗ ಬಂದುಬಿಡು ನೀ...
ಒ ಮ್ಮೆ ನೀ ಬಾ ಸನಿಹ
ಓ ಡಿಸುತ ಈ ವಿರಹ
ಔ ಪಾಸಿಸಿಹೆ ನಿನ್ನ ಹೆಸರ ಅನವರತ...
ಅಂತರಾತ್ಮವು ನಿನ್ನ ಬರಕಾಯುತಿಹುದು...
ಅಹುದು ಆಗಲಿ ಎಂದು ಬಂದುಬಿಡು ನೀ...
.
ಕೆಂಡಸಂಪಿಗೆ

. . . . . . . . ಸಖ್ಯಮೇಧ

ಹೂ...

ಒಮ್ಮೆ ಹೂ ಅರಳುವುದ ನೋಡುವಾಸೆ....
ಗೆಳತೀ ....
ನಕ್ಕುಬಿಡು...

ನೀನಿರದೇ....,,,

ಗೆಳತೀ ...,
ನೀನಿರದಿರೆ....

ಖುಷಿನೀಡದು ಶಶಿಯುಷೆಯೂ
ತೃಷೆನೀಗದು ಪೀಯೂಷವೂ
ನಶೆಯೇರದು ನಿಶೆಯಲ್ಲೂ
ದಿಶೆತಪ್ಪಿದೆ ಆಶೆಯದು...
.
    ವಶವಾಗಿಹೆ ಕುಶಲತೆಗೆ
    ಸುಷ್ಮಸುಮಸಮಾಕರ್ಷಣೆಗೆ...
    ಕೃಶವಾಗಿಹೆ ಮನಸೋತಿಹೆ
    ಹೊಸಭಾವದ ಘರ್ಷಣೆಗೆ...!
ಕೆಂಡಸಂಪಿಗೆ
ಶಿಶಿರ
. . . . . .  . ಸಖ್ಯಮೇಧ

ಅವಳು

ಮಂಜಿನೋಕುಳಿ ನಡುವೆ
ತೊಯ್ದಿರುವ ಗರಿಕೆಯಾ-
ಮೇಲಿರುವ ಇಬ್ಬನಿಯು
ಅವಳ ಕಣ್ಣಂತೆ...!

ಬೀಸುಗಾಳಿಗೆ ಕೊಂಚ-
ಕೊಂಚವೇ ಬಳುಕುವಾ
ಹೊಂಬಾಳೆ ಬಿರಿದಂತೆ
ಅವಳ ನಗುವು...!

ಕಲ್ಪವೃಕ್ಷದ ಮೇಲೆ
ಇಬ್ಬನಿಯು ಒಂದಾಗಿ
ಹನಿಯು ಕೆಳಗಿಳಿವಂತೆ
ಅವಳ ಮಾತು...!

ಕೆಂಡಸಂಪಿಗೆ

. . . . . ಸಖ್ಯಮೇಧ

ಮೆರವಣಿಗೆ

ಮನದ ಬಾನಲ್ಲಿ ನೀ ನಲಿವ ನಕ್ಷತ್ರ...
ಕನಸ ಗೋಡೆಯ ತುಂಬ ನಿನ್ನದೇ ಸುಚಿತ್ರ...
ಅನುನಯದಿ ಒಲವಾದೆ ನೀ ಕೆಂಡಸಂಪಿಗೆ ...
ಎದೆಯ ಬೀದಿಯ ತುಂಬ
ನಿನ್ನದೇ ಮೆರವಣಿಗೆ ...
.
ನಿನ್ನ ಮನನದಿ ನನ್ನತನವಿನ್ನು ಗೌಣ...
ನಿನ್ನ ನಗುವಲಿ ನನ್ನ ತ್ರಾಣವೂ ಲೀನ...
ನಿನ್ನ ನೆನಪಲಿ ಮನವು ಅನುದಿನವೂ ತಲ್ಲೀನ...
ನಿನ್ನ ಮಿಲನದಿ ನನ್ನ ಜನ್ಮವೂ ಧನ್ಯ...
. . . . . ಸಖ್ಯಮೇಧ

ಕಳವಳ

ಒಳಗೊಳಗೇ ಕಳವಳವು
ತಿಳಿಗೊಳದಿ ಅಲೆಯಲೆಯು
ಎಳೆಬಿಸಿಲ ಝಳಕಕ್ಕೆ
ಸುಡುಬಿಸಿಲ ಬಳುವಳಿಯು
ತಿಳುವಳಿಕೆ ಮನಕಿಲ್ಲ
ತಳಮಳಕೆ ಕೊನೆಯಿಲ್ಲ
ಕೊಳೆಕೊಳೆತು ನಾರುತಿವೆ
ಅಳಿದುಳಿದ ನೆನಪುಗಳೂ
ಕಳೆಕೊಳೆಗಳೆದೆಯಲ್ಲಿ
ಬೆಳೆಬೆಳೆದು ನಿಂತಿವೆ...
ಭಾವಕ್ಕಿಲ್ಲ_ಬೆಲೆ
. . . . . ಸಖ್ಯಮೇಧ

ಕದ್ದು ಮಾತಾಡು

ನೀ ಕದ್ದು ಮಾತಾಡು, ಮುದ್ದಾದ ಪದ
ಹೇಳು
ಮನ ಎದ್ದು ಕುಣಿವಂತೆ ಉದ್ದುದ್ದ ಕತೆ ಹೇಳು,
ಆಗಾಗ ಪೆದ್ದಾಗಿ ಬಿದ್ದ ಕನಸನು ಹೇಳು,
ಖುದ್ದಾಗಿ ಬಂದುಬಿಡು, ಬಿದ್ದಿರುವೆ
ಪ್ರೀತಿಯಲಿ....
ಕೆಂಡಸಂಪಿಗೆ
. . . . . . . . ಸಖ್ಯಮೇಧ

ಕದಪು ಕೆಂಡಸಂಪಿಗೆ

ಅವಳ ಕದಪುಗಳಲ್ಲಿ ಹೊಸ  ಕೆಂಡಸಂಪಿಗೆ...
ಅವಳು ನಾಚುತ್ತಲಿರೆ ಅವು ಕೆಂಪಕೆಂಪಗೆ....
ಸೋತು ಹೋಗುವ ಭಯವು ನನ್ನವಳ
ಕಂಪಿಗೆ...
ಮೈಮರೆತು ಬಿಡುವಾಸೆ ಅವಳುಸಿರ ಇಂಪಿಗೆ....
. . . . . . . . . ಸಖ್ಯಮೇಧ

ಬದಲಾವಣೆ

ಹೊಸತನ....!!
ಹಂಬಲವೂ ಕಂಬನಿಯೂ ದೂರಾಯ್ತು; ಸಂತಸದ-
ಹಂದರವು, ಸುಂದರವು ಮನವು ಈಗ...!
ಬದಲಾದೆ, ಮೊದಲಾದೆ, ಕೆಂಡಸಂಪಿಗೆ ಕೇಳೆ-
ಹೊಸಕಂಪು ಬಾಳಲ್ಲಿ ಸೂಸುತಿಹುದು..!!
.
ಚಂದವಿದೆ ಹೊಸ ಬಾಳು, ಪರಿಶುಭ್ರ ಬಾನಂತೆ
ಹೊಸಚುಕ್ಕಿ ಎರಡೆರಡು ಹೊಳೆಯುತಿಹುದು...
ಸ್ವಚ್ಛಂದ ಮನಸು, ಸ್ವಚ್ಛಂದ ದಾರಿ
ಬದುಕೀಗ ನಿರಾಳ
ನನ್ನೊಲವಿನೊಡನೆ...!
.
. . . . . . . . ಸಖ್ಯಮೇಧ